انتخابات مصر 2010 وطني اخر حاجة

معرفش ايه كم العداء والكراهية اللي بين النظام الحاكم في مصر والشعب المصري وكأن الشعب ده جوز ام النظام او مرات ابوه ده ان كنا مومنين ان النظام ده لة اب وام لان هناك بعض الراويات صحيحة الاسناد بتقول ان النظام اللي بيحكمنا دة نزل علينا زي القضي المستعجل من غير ام واب(لقيط يعني) والعهدة طبعا علي الراوي.....هذا الشعب المسكين الماسوف علي شبابه عاني كل صنوف المعاناة التي يتخيلها او لايتخيلها بشر مع هذا النظام الحاكم......وانا هنا لااقصد فترة مبارك والسادات وعبد الناصر وفاروق فحسب ولكن اتكلم عن مصر المحروسة المكبوسة....... عبر تاريخها واللي عاوز يتاكد من كلامي يراجع تاريخ المجاعات والفقر المطبق والاذلال الذي عاني منة الصريون عبر التاريخ منذ الفراعيين وحتي عهد(رجالة) الفكر الجديد بتوع الحزب الوطني الاستعماري....... قصدي الديموقراطي ..ربنا ما يديمو عليكم.......اذن مصر متغيرش فيها حاجة احنا دولة مماليك تحكمها عقلية العبيد.....وطبعا المماليك علشان يحكموا ويتحكموا لازم يستعينوا بالاضيش( جمع الضوش يعني صبي مملوك وفي احد التعريفات يعني مشهلاتي) ودة هو السبب الحقيقي الذي يفسر هذة الضجة المفتعلة (جعجعة بلا طحين) اللي بيسموها انتخابات 2010 لان المماليك عاوزيين يختاروا الضيشهم (صبيانهم) اللي هيساعدوهم في استعباد هذا البلد المرحوم (يعني اللي انتقل الي رحمة الله) انما بقي تقولي ....تشريع ورقابة.....وسلطة تشريعيةو برلمان......... وابصر ايه مفيش عندي غير كلمة واحدة؟..............ولا بلاش قلة ادب من اولها............وفضوها سيرة
لقطات
الدكتور احمد فتحي شرور(قصدي سرور) لة تصريح النهارده في المصري اليوم بيقول فيه ان الضغوط الامريكية علي مصر ستودي الي وجود دولة دينية في مصر(ال يعني الاخوان)وان مينفعش امريكا تعمل كدة مع مصر وهي اكبر حليف لامريكا في المنطقة!!!.......انتهي تصريح المواطن ده وانا بدوري بقوله: يا اختي عليه ........طعم يا اخواتي طعامة مش علي حد...... يا راجل انت مش مكسوف علي دمك الكلام ده قديم قوي قول حاجة جديدة معدش البوقين دول ينطلوا علي حد ومع ذلك يا عم الحج انا مش هزعلك انا عارف ان نص كلامك التاني صح وهو ان مصر هي اكبر حليف لامريكا في المنطقة بس لو تسمح لي اغير كلمة واحدة واقول عميل وليس حليف وده طبعا لزوم الحفاظ علي العرش!!!
في نفس التوقيت بقه خرج علينا الدكتور مصطفي الفقي(مطيباتي النظام) وقال لنا كلام تاني ......ال ايه التدخلات الامريكية ديه مرفوضة ودة يعد استفزاز لمصر...... وال ايه كمان ان امريكا بتعمل كدة ردا علي دور مصر الاقليمي!!!يا حلاوتها.......حوش ياراجل دور مصر والنبي لاتحوش احسن دور مصر طرطش وهيغرق الدنيا.....يا عم عيب عليك ده احنا بندور علي دور مصر بميكروسكوب رباعي الابعاد بتاع احمد زويل ومش عارفين نلاقيه..... وبعدين مش انت اللي قلت قبل كدة ان رئيس مصر بيجي بناء علي قرار امريكي ورضااسرائيلي زعلان ليه بقة من تدخلات امريكا الاستفزازية الاولي بيك يا راجل تزعل من بتاعت الرئيس ولا ايه ايها المطيباتي؟
نشر بالصحف النهارده ان الدكتور محمد نصر الدين علام وزير الري والموارد المائية امتنع عن حضور اجتماع بخصوص نهر النيل في اثيوبيا......ليه بقه لان الباش مهندس ده مرشح نفسه في مدينة جهينة في سوهاج... يا سلام !! ويروح للنيل ليه في ستين الف داهية ......طيب يا عم والله العظيم انت هتنجح وكدة كدة الانتخابات هتزورلك خايف من ايه بقه طب يااخي روح الاجتماع واحنا نروح نزورلك........امال ايه ما دة واجب (وطني ) برضة
يا عالم فضوها سيرة


0